Dhëmbët e parë fëmijës i dalin dikur tek rreth gjashtë deri tetë muajtë. Por meqënëse fëmijët zhvillohen jo njësoj edhe pika kohore e daljes së dhëmbëve të parë ndryshon nga fëmija në fëmijë. Disa fëmijëve mund t'u dalin dhëmbët e parë më shpejt se koha e përmendur më lart, disa të tjerëve u duhet të presin derisa të bëhen një vjeç.
Zakonisht dalin në fillim dy dhëmbët e mesit në nofullën e poshtme, për t'u ndjekur pastaj nga dhëmbët përgjegjës në nofullën e sipërme. Dhëmballat e para dalin kur fëmija është një deri në një vjeç e gjysëm, dhe kur fëmija është dy e gjysëm deri tre vjeç i kanë dalur të gjithë dhëmbët e qumështit.
Njeriut, ashtu si shumë gjitarëve të tjerë, i dalin dy rende dhëmbësh. Dhëmbët e parë, ato të qumështit, i përshtaten gojës së fëmijës së vogël. Ndoshta janë quajtur dhëmbë të qumështit pasi dalin kur fëmija ushqehet me qumështin e gjirit, dhe pasi ato janë më të bardhë nga rendi pasues i dhëmbëve. Dhëmbët e qumështit quhen edhe dhëmbë paraprakë, në ndryshim nga dhëmbët e pjekjes që quhen dhëmbë të përhershëm.
Gjithsej fëmijëve u dalin 20 dhëmbë qumështi, dhjetë në nofullën e sipërme dhe dhjetë në të poshtmen.
Shpeshherë fëmijëve u dalin dhëmbët pa u shkaktuar shqetësime, por ndonjëherë kanë kruajtje në gojë dhe fëmija mund të ketë acarim të mishit të dhëmbëve aty ku dhëmbi çan përpara. Mund të jetë i këndshëm për fëmijën masazhi i mishit të dhëmbëve, p.sh. nëpërmjet kafshimit të një unaze kafshuese fëmijësh apo nëse prindëri i fërkon me kujdes mishin e dhëmbëve me gisht apo një furçë të butë dhëmbësh.
Disa prindër thonë se fëmijës i rritet temperatura trupore apo heq bark kur janë duke i dalur dhëmbët. Fëmijët e vegjël infektohen shpesh, ndonjëherë njëkohësisht ndërsa janë duke u dalur dhëmbët kështu që simptomat e këtyre infeksioneve u vihen dhëmbëve që po dalin.
Përgatiti : Alvin Ekmekçiu
Burimi: suedezja Infomedica/Barns tänder, frågor och svar / Få nya tänder/Rishqyrtuar 2004-12-21
Vë re! Ky shkrim nuk lejohet të kopjohet dhe të përdoret për qëllime komerciale (fitimprurëse). Mbi lejet e përdorimit të shkrimeve të © Rruzull.net lexo këtu.
|
