Homo floresiensis është përshkruar si një nga zbulimet më të mahnitshme në paleontologji në një gjysëm shekulli - dhe si njeriu më i skajshëm që është gjetur ndonjëherë. Ai ndryshon botëkuptimin tonë mbi evolucionin njerëzor. Pasi këtë gjetje është e vështirë ta rendisësh drejtë në skemën e njohur deri më sot. Disa dijetarë nuk janë të sigurtë që njeriu i Flores'ës vallë të mund të renditet në llojin Homo.
Vijon nga Homo floresiensis - njerëzit xhuxhë të Flores'ës
Marta Mirazón Lahr dhe Robert Foley, që të dy të Leverhulme Centre for Human Evolutionary Studies (Qendrës së Leverhulme për Studime të Evolucionit Njerëzor) në Universitetin Cambridge (Kembrixh), Angli, thonë se Homo floresiensis ndryshon të kuptuarit tonë mbi gjeografinë, biologjinë dhe kulturën evolucionare të njeriut të vonë.
Home floresiensis ishte pjesë e shpërhapjes në Azi të pasardhësve të Homo ergaster dhe Homo erectus.
Fig.: Nature |
Ka të ngjarë që paraardhësit e këtij lloj njeriu kanë zbritur në Flores'ë në kohët parahistorike. Hulumtuesit pandehin se xhuxhët në Flores'ë janë pasardhës të Homo erectus, 180 centimetra të gjatë që arriti në Flores'ë para rreth 840 000 vjetësh. Ishulli ofronte kushte pothuajse ideale: klimë të nxehtë dhe kurrfarë armiqsh. Megjithatë ushqimi ishte në sasi të kufizuara. Kështu që të ishe i vogël, të shpenzoje pak energji, ishte një përparësi.
Xhuxhizmi
Xhuxhizmi është ndër kafshë, që jetojnë në ishuj të veçuar, një dukuri e njohur. Rezervat e kufizuara ushqimore i bëjnë banorët e ishullit të shkurtohen përgjatë mijëvjeçarëve. Në Ishullin Wrangel (Wrangel Island) ka pasur dikur mini- mamutë, të cilët i kanë mbijetuar me mijëra vjet kushërinjtë e tyre të mëdhenj të steres. Edhe në Siçili dhe në Malta kanë pasur jetuar elefantë me një gjatësi deri në supe prej 100 centimetrash. Që xhuxhizmi ishullor mund të ishte i mundur edhe tek njerëzit dhe për më tepër zvogëlonte edhe trurin, nuk e kishin çuar kurrë ndër mend shkencëtarët. Ishulli indonezian i Flores'ës (Në të majtë sipër është Borneo, në të djathtë poshtë Australia)
Burimi: Welt der Wunder GmbH |
Dieta
"Ndonëse ata nuk u ngjajnë në pamje njerëzve modernë, disa nga sjelljet e tyre ishin në mënyrë të befasueshme njerëzore", thotë Peter Brown, një paleoantropologjist i Universitetit të New England (Nju Inglënd) në New South Wales (Nju Sauth Uelz), Australi. Njerëzit Flores përdornin zjarrin në vatra për zierje dhe gjuanin stegodonë. Pothuajse të gjitha kockat e stegodonëve të lidhura me almise njerëzore janë të të vegjëlve, duke na lënë të kuptojmë se njerëzit e vecërr gjuanin në mënyrë përzgjedhëse stegodonët më të vegjël. Dieta e njerëzve të Flores'ës përfshinte gjithashtu peshq, bretkosa, gjarpërinj, breshka, zogj, brejtës gjigantë dhe dragonj Komodo, një lloj hardhjeje që mund të rritet deri në 3 metra dhe që jeton akoma edhe sot.
Përgatiti : Alvin Ekmekçiu
Burimet: Urzeit Hobbits - Die Zwergmenschen von Flores/Welt der Wunder/23.01.2005Hobbit-Like Human Ancestor Found in Asia/National Geographic /27.10.2004Flores man/Nature
Vë re! Ky shkrim nuk lejohet të kopjohet dhe të përdoret për qëllime komerciale (fitimprurëse). Mbi lejet e përdorimit të shkrimeve të © Rruzull.net lexo këtu.
| 
