Ndërkaq shkencëtarët thonë se kanë zhvilluar një ilaç të ri të efektshëm për trajtimin e kancerit të gjirit. Por ata thonë se ilaçi i ri, i cili quhet Arimidex, është më i efektshëm nëse kanceri i gjirit shfaqet në periudhën pas menopauzës dhe si i tillë nuk mund të zevendësojë ilaçin e deritanishëm, Tamoxifen, ilaç që jepet për gratë që vuajnë nga kanceri i gjirit. Gjatë 30 vjetëve të fundit, Tamaxifen'i ka qenë mjekimi standart për gratë në periudhën e pas menopauzës.

Në një studim klinik të kryer me fondet e kompanisë Astra Zeneca, e cila prodhon Arimidex'in, u përfshinë rreth 9 mijë gra nga vende të ndryshme. Gratë që morën Arimidex për 5 vjet, pas kurimit të kancerit të gjirit në fazën e parë, i kishin më të pakta mundësinë për zhvillimin e mëtejshëm të kancerit, apo përhapjen e tij në trup, krahasuar me gratë që merrnin Tamoxifen. Por ky studim tregoi se Arimidex'i ishte 26 për qind më i efektshëm se Tamoxifen'i përsa i përket zhvillimit të tumoreve të reja. Edhe efektet anësore ishin më të pakta.

Arimidex'i zakonisht njihet si anastrozole, një nga ilaçet e reja që parandalon prodhimin e estrogjenit. Estrogjeni nxit zhvillimin e rreth tre të katërtave të tumoreve që ndodhin në periudhën pas menopauzës tek gratë.

Arimidex'i provoi gjithashtu se është më i mirë se Tamoxifeni edhe në një tjetër aspekt të rëndësishëm. Profesori Jeffery Tobias, i Spitalit Universitar të Britanisë thotë se provat treguan se Arimideksi pakëson rrezikun e përhapjes së kancerit, që është aspekti fatal i sëmundjes së kancerit. Megjithëse Arimideksi mund të jetë i aftë të parandalojë deri në 80 për qind të tipeve më të zakonshme të tumoreve, që prekin gratë në periudhën pas menopauzës, përsëri Tamoxifen'i vazhdon të jetë mjekimi që përdoret për gratë që preken nga kanceri i gjirit para menopauzës, kryesisht për asrye se mjekimi i ri nuk mendohet të jetë po aq i efektshëm në atë periudhë.

Burimet: