Nga Një burim - E enjte , 09 dhjetor 2004

Dr. Reinhard Kalenda, drejtor i projektit për Shqiperinë, në kompaninë gjermane" Hochtief" thotë se ky projekt është fillimi i shndërrimit të Shqipërisë në një port të hyrjes dhe daljes në rajon. "Kompania jonë mendon që Europa Juglindore shumë shpejt do të bëhet një qendër transporti dhe udhëtimesh. Kjo vlen edhe për Shqipërinë. Një arësye tjetër pse konkuruam për të marrë këtë aeroport është se Hochtief po fokusohet gjithmonë e më tepër në menaxhimin e aeroporteve për t`i bërë ata më efikasë në biznes, më të vlerësuar nga udhëtarët dhe për të përmirësuar gjithë infrastrukturën e transportit". Projekti i Aeroportit të Tiranës është një nga projektet e preferuara për kompaninë. Drejtuesit e Hochtief mendojnë që vetë Shqipëria ka një rrugë interesante për t´u integruar në BE dhe kjo kompani dëshiron të marrë pjesë dhe të kontribuojë. "Konsorciumi " Partnerët e aeroportit të Tiranës" do të marrin të gjitha fitimet nga menaxhimi per 20 vjet dhe do t´i paguajnë në bazë të marrëveshjes një taksë menaxhimi shtetit ", thotë Reinhard Kalenda.

"Hochtief" do të ndërtojë terminalin e ri të pasagjereve, rrugët lidhëse brenda aeroporit dhe do të zgjerojë pistën e tij. Terminali i ri do të ketë një kapacitet prej 1 milionë pasagjerësh në vit. Sot për sot Rinasin e përdorin më shumë se 600 mijë pasagjerë në vit.

Veç ndërtimit të terminalit do të ketë edhe ndërtime të disa lehtësirave të tjera për udhëtarët si ajo e parkimit dhe e përmiresimit në përgjithësi të situatës në aeroportin e Rinasit. Ristrukturimi do të garantojë standarte të larta të sigurisë në tokë si për avionët ashtu edhe për pasagjerët."

Do të ndërtohet një rrugës e re prej 7 km, e cila mendohet të fillojë në kryqëzimin e ri të autostradës Tiranë – Durrës dhe të përfundojë në aeroport.

Ajo që Hochtief ka propozuar për terminalin e ri të pasagjerëve është shumë moderne, me koncepte të reja. Aeroportet janë një element i rëndësishëm për një vend, për të përmirësuar infrastrukturën, për të tërhequr njerëzit nga jashtë. Dhe "Hochtief" është një kompani e mirënjohur në të gjithë botën në ndërtimin dhe menaxhimin e aeroporteve. Aeroporti i parë i ndërtuar prej kësaj kommpanie daton në vitin 1934. "Hochtief" ka ndërtuar aeroportin e Düsseldorfit, të Frankfurtit, të Budapestit, të Athines, të Sidnejt, të Xhedah në Arabinë Saudite dhe shumë të tjerë, që nga më të vegjëlit deri tek më të mëdhenjtë. Ndërtimi më i madh ka qenë ai në Arabinë Saudite me një volum financiar prej 7 bilionë dollarësh. Në të gjithë aeroportet që kompania ka ndërtuar dhe i menaxhon lëvizin më shumë se 62 milionë pasagjerë në vit.

Shifra të tilla nuk janë domethënëse vetëm për kompaninë " Hochtief". Ato tregojnë se qeveria shqiptare kësaj here ka bërë zgjedhjen e duhur.

Burimi: Në vitin 2007 Shqipëria do të ketë aeroportin e saj ndërkombëtar të standarteve europiane/DW