Ekspertët kanë frikë, se virusi i gripit të shpendëve i përhapur vrullshëm në Azi mund të përzihet me viruset e gripit njerëzor. Në këtë mënyrë mund të krijohet një virus gripal krejt i ri ndaj të cilit nuk është askush imun. Ky mund të përhapet në mbarë botën nëpërmjet qarkullimit ajror duke rrezikuar miliona njerëz. Në një rast të tillë sipas vlerësimeve të Organizatës Botërore për Shëndetin aktualisht një në tre vetë mund të sëmuret nga gripi dhe 1% e të infektuarve do të vdesin.
Kjo organizatë frikësohet se në stadin aktual nuk është e mundur që të vihen në dispozicion vaksina e nevojshme. Klaus Stöhr, drejtor në sektorin e Organizatës Botërore të Shëndetësisë për gripin thotë:
"Ne shohim se ka mundësi që brenda një kohe të caktuar ne të jemi në gjendje të zhvillojmë vaksina, t´i licensojmë ato dhe të realizojmë të gjitha provat e nevojshme në rast se përhapet një virus i tillë..."
Por sipas zotit Stöhr deri më sot janë vetëm dy firma që janë në gjendje të prodhojnë një vaksinë të tillë brenda një afati të parashikueshëm, këto janë Chiron dhe Aventis, kjo për faktin që këto firma janë shumë të avancuara në fushën e studimeve dhe kërkimeve.
Organizata Botërore e Shëndetësisë në konferencën e Gjenevës propozi që të merren disa masa për të thjeshtuar procedurën e provës dhe licensimit të këtyre vaksinave. Zakonisht lejimi i një medikamenti presupozon një procedurë të stërzgjatur dhe me shumë pengesa që shpesh herë mund të zgjasë me vite.
Organizata botërore e Shëndetësisë bën të qartë se një problem i tillë global nuk mund të zgjidhet vetëm në nivel kombëtar, është e nevojshme që të ketë bashkëpunim dhe koordinim për zhvillimin e vaksinave.
Burimi: Mjekët po japin alarmin duke paralajmëruar nga një epidemi gripale globale/DW
| 
