Këshilltari kryesor i qeverisë britanike për çështjet shkencore, David King, ka paralajmëruar se ndryshimi i klimës është problemi më i madh me të cilit është përballur bota këto pesë mijë vitet e fundit.

Një nga arësyet është nxehja e vazhdueshme e tokës për shkak të efektit të serës. Deri në fund të këtij shekulli temperatura mesatare do të rritet në përgjithësi me 1,5 deri në 6 gradë, thotë meteorologu duke iu referuar një raporti të OKB-së i përpiluar prej klimatologëve të njohur: "Kjo do të thotë që ne në tokë do të kemi temeperatura që nuk i ka përjetuar ndonjëherë njerëzimi, të lidhura këto natyrisht me një rritje shumë të fuqishme të vlerave të temperaturave ekstreme. Vera e fundit në Evropën Qendrore ishte si një vështrim në të ardhmen. Kjo verë na tregoi, se si do të ndryshojë klima dhe se në të ardhmen duhet të jemi të përgatitur për të nxehtit ekstrem e thatësirat."

Shkencëtarja amerikane Katherine Hayoe parashikon që një mot më i ngrohtë do të kushtojë jetë njerëzish, veçanërisht në se nuk pakësohet niveli i gazrave të dëmshëm që çlirohen në atmosferë si pasojë e djegjes së karburanteve. Ajo thotë se vdekshmëria si pasojë e një klime më të nxehtë mund të rritet nga 130 deri në 500 përqind deri në fund të shekullit.

.Shkencëtari Mathias Ruth thotë se pas 30 vjetësh, klima në Boston do t’i ngjajë pak a shumë asaj të një shteti jugor, pra më e ngrohtë. Kjo do të thotë se ngrohja globale me të vërtetë do të ketë një ndikim të madh në jetën në planet.

Me nivelet e tanishme të emetimit të dyoksidit të karbonit në atmosferë, akulli i planetit do shkrihej me ritme marramendëse. Qytete si Londra, Nju Jorku dhe Nju Orleansi do të ishin të parat që do të mbuloheshin nga uji. Kupola të lashta të akullta, si ajo në malin Kilimanxharo në Tanzani, pritet të zhduken brenda rreth 40 vitesh.

Një koalicion i organizatave të zhvillimit dhe mjedisit paralajmëron se ndryshimi i klimës po kufizon progresin ekonomik në kombet e varfra. Në një raport të ri, ata thonë se ngrohja globale mund të parandalojë plotësimin e objektivave të mileniumit.

Katër vjet më parë, udhëheqës nga afro 200 vende nënshkruan objektivat e mileniumit. Uria dhe varfëria duhet të përgjysmoheshin nga viti 2015, furnizimi me ujë të pastër dhe gjendja sanitare të përmirësohej, si dhe të zvogëlohej numri i sëmundjeve.

Raporti thotë se ndryshimi i klimës do të rrisë numrin e njerëzve pa ujë të pijshëm, do të shtojë sëmundjet si dhe do të ketë afro 150 milionë refugjatë mjedisorë.

Dëme nuk shkaktohen vetëm prej ndryshimit të klimës. Sepse dukuritë e natyrës po prekin gjithnjë e më shumë njerëzit. Popullsia në botë gjatë 50 vjetëve të fundit është rritur më shumë se dyfishi. Shumica e njerëzve jetojnë në qytete të mëdha, vëren Gerd Berz: "Kësaj i shtohet gjithashtu edhe fakti që qytetet jo vetëm po rriten prej numrit të popullsisë, por edhe nga zgjerimi i sipërfaqes së tyre. Kjo do të thotë që shtohet gjithnjë e më shumë probabiliteti që një dukuri e madhe natyrore të prekë pikërisht këto qytete, që shtrihen kryesisht në rajone të ekspozuara. Më shumë të prekur janë zonat që shtrihen në bregdet. Kjo tendencë është karakterisitke në mbarë botën."

Sipas vrojtimeve të zotit Berz, njerëzit dhe vlerat materiale në zonat me popullsi të dendur janë më shumë të prekura: "Sot ne jemi të varur në cdo sekondë nga një infrastrukturë funksionuese. Nëse ndodh një avari e vogël në të, sic është tipike për katastrofat natyrore, atëherë ndërpirtet furnizimi me rrymë, gaz, ose naftë. Si rjedhojë nuk ka më qarkullim dhe as komunikacion. Të gjitha këto janë mëse të rëndësishme për jetën ekonomike të secilit prej nesh. Ndaj një katastrofë natyrore në shumicën e rasteve shkakton një ndryshim me pasoja të mëdha."

Sigurimet marrin përsipër rreth 1/5 e vlerës së dëmeve materiale të shkaktuara nga katastrofat natyrore.

Për të minimizuar dëmet që shkaktojnë dukuritë natyrore duhet të merren parasysh faktorët socio-ekonomikë si infrastruktura dhe urbanisitika e qyteteve, vëren Gerd Berz. Kjo gamë duhet të përfshijë si rregullat sizmiologjike për zonat sizmike ashtu edhe kufizimet për shfrytëzimin e sipërfaqeve bujqësore në zonat e rrezikuara, pra katalogu i masave që duhen marrë në konsideratë është voluminoz. Në këtë drejtim janë të rëndësishme iniciativat lokale. Në fund të fundit problemet më të mëdha krijohen nëpër qytete. Por moti si fenomen global kërkon edhe një mbrojtje globale të klimës. Dëmet jo vetëm që duhet të reduktohen, por mundësisht edhe të parandalohen. Politika i shfrytëzon rezultatet e studimeve të sektorit të rreziqeve gjeografike nën drejtimin e Gerd Berz si një "sistem paralajmërues". Por ç´vlerë kanë këto pëpjekje nëse shtetet e industrializuara si SHBA, që janë përgjegjëse për 1/4 e emisioneve të gazit në botë, nuk marrin pjesë në protokollin e Kiotos për mbrojtjen e klimës? "Sipas përllogaritjeve të mia, vendet e industrializuara janë përgjegjëse për 75% të emisioneve të gazit. Pa SHBA kjo kuotë do të ishte 50%, thotë Gerd Berz.

Iniciativa për marrjen e masave për reduktimin e ngrohjes globale përbën ndërkohë objektivat e reja të shpallura të shumë qeverive perëndimore e organizatave ambientaliste për këtë shekull.

Ndërkohë, pranë stacionit ndërkombëtar LAX në Los Anxhelos u hap stacioni i parë i furnizimit të makinave që punojnë me hidrogjen. Nga pamja e jashtme, kjo pikë furnizimit me hidrogjen duket si stacion benzine. Guvernatori Shvarceneger erdhi për të përuruar stacionin e hidrogjenit hypur në një makine të re që punon me hidrogjen, për të treguar se kjo teknologji i përket së ardhmes. Tani për tani ky stacion do të përdoret nga 6 makina duke shënuar fillimin e zbatimit të planeve për këtë teknologji. Planet janë për hapjen e një rrjeti të gjërë stacionesh deri në 200 për furnizimin e makinave me hidrogjen në mbarë shtetin e Kalifornisë. Në çdo 30 kilometra parashikohet të ketë një pikë të tillë furnizimi. Por hidrogjeni nuk është i lirë. Sot hidrogjeni kushton 5 herë më shumë se benzina. Zyrtarët shpresojnë se sa më shumë të shtohet përdorimi i hidrogjenit, stacionet e furnizimit me të do të shtohen dhe kështu duke u shtuar konkurenca edhe çmimet të fillojnë të ulen.

Burimet: