Në vend të një zhvillimi disa miliona vjeçar, njeriu qenka krijuar brenda një dite të vetme.

Charles Darwin sharlatan ?

Edhe qeniet e tjera të gjalla, sipas kësaj teze fetare, u krijuan sa mbyll e çel sytë. Për shembull trajtat e shumëllojshme të kandrrave, sipas tyre, nuk janë pasoja të përshtatjes dhe përzgjedhjes.
Citate fjalë për fjalë nga interpretime të Biblës apo Kuranit na u dashka të zëvendësojnë librin e biologjisë. Tregimi mbi Krijmin e jetës dhe të botës brenda shtatë ditëve na qenka një përshkrim me përpikmëri të madhe.
Gjysma e amerikanëve janë të bindur se Teoria e Evolucionit është shejtaní dhe se Charles Darwin'i është një sharlatan.

Nëse u besohet krijimistëve atëherë Toka u krijua si prodhim i gatshëm para rreth 6 000 vjetësh. Planeti ynë nuk paska ndryshuar aspak që nga krijimi, as kontinentet dhe oqeanet. Ndonjë rrjedhë gjeologjike nuk paska pasur. Në kundërshtim me njohuritë e shkencave të Tokës, Alpeve nuk iu deshën miliona vjet për të marrë trajtën e sotme por vetëm disa orë. Në botën e krijimistëve të gjithë kafshët janë krijuar në të njëjtën kohë. Edhe kjo e pambështetur nga njohuritë shkencore. Vetë njeriu paska jetuar në të njëjtën kohë me gjigandët parahistorikë si dinozaurët.

Fosilet si dëshmitarë të Përmbytjes së Botës

Por idili nuk zgjati përgjithmonë. Banorët mëkatarë të Tokës ngjallën zemërimin e Krijuesit dhe duhej të dënoheshin me një gjëmë shkretuese. Por po të interpretojmë fjalë për fjalë Biblën, u arrit të shpëtohej nga një çift prej secilit lloj kafshësh. Arka e Nuës i paska ofruar shpëtim edhe vetë dinozaurëve, të cilët janë mbartur si vezë. Pastaj erdhi Vërshimi i Ujit. Ky bëri pamëshirshëm kërdinë dhe ndryshoi përgjithmonë faqen e dheut. Vetëm nën mbrojtjen e Arkës arriti jeta të ia dalë tejetej. Përveç Arkës, gjithçka tjetër u asgjësua.

Kështu krijimistët i shpjegojnë fosilet, gjetjet kockore nga kohët parahistorike; si dëshmitarë të kësaj gjëme. Kockat qenkan kthyer në gurë përbrenda 4 000 vjetësh që nga Përmbytja e Botës. Sipas bindjeve shkencore kjo merr të paktën 10 000 vjet, shpesh më tepër. Kockat e dinozaurëve, në thelb dëshmi të qarta të evolucionit, shndërrohen në dëshmitarë të Përmbytjes së Botës. Një skenar që t'i ngre qimet e kokës përpjetë, i cili shpërfill njohuritë themelore të gjeologjisë dhe biologjisë. Ajo që mbetet është një bindje armiqësore ndaj shkencës, e cila duhet ngulitur me të gjitha mjetet në kokat e njerëzve.

Manipulime nëpër shkolla e në internet

Manipulime në vend të shqyrtimeve dhe njohjeve - një shtjellim që kishim menduar se e kishim lënë pas.
Apologjetët myslimanë përpiqen si e si t'u mbushin mendjen njerëzve se si Kurani na qenka shkencë dhe shkojnë deri aty sa thonë se për të bërë shkencë nuk është nevoja të bësh studime, hulumtime dhe eksperimente por do të mjaftonte të studioje Kuranin pasi të gjitha përgjigjet na qenkan aty.
Propaganda e kësaj lëvizjeje të re apologjetësh myslimanë është përhapur më të madhe edhe në atë pjesë të internetit që flet shqip. Përveçse kanë bërë plot faqe shqipe në internet, apologjetët nuk kanë lënë vend e kuvend pa u futur, konkretisht këtu tek revista Rruzull kanë dhënë një sërë përgjigjesh në Kuvendin e revistës si dhe pas shkrimeve që bien ndesh me botëkuptimin e tyre apo që nuk u shkojnë për shtat, si ç'është rasti i këtij shkrimi. Shumë të tillë nuk ngurojnë të kërcënojnë edhe në emër të Zotit. Këta apologjetë myslimano-shqiptarë kanë në dispozicion një burim jo të vogël propagandik shkrimesh të përkthyera në shqip nga arabishtja apo turqishtja.

Meqënëse nuk kam mundur të vëj re akoma ndonjë konflikt të hapur midis kësaj lëvizjeje të re apologjetësh dhe rrjedhës tradicionale myslimane, nuk di të them nëse bëhet fjalë për ndonjë lëvizje që kërkon të shkëputet nga myslimanizmi tradicional për të krijuar një degë të re fetare, në po të njëjtën mënyrë si protestanizmi. Vlen të thuhet se lëvizja e apologjetëve myslimanë mund të sjellë një përparim për myslimanin e bindur pasi përpiqet të shpjegojë arritjet shkencore përmes Kuranit, pra të paktën e njeh myslimanin e bindur me arritjet shkencore. Jashtë këtij kuadri, ajo përbën një kërcënim për qytetërimin pasi përpiqet ta kthejë njerëzimin edhe njëherë në Mesjetën e errët fetare.

Para së gjithash në SHBA po shtohet trysnia politike që krijmizmi të pranohet gjithnjë e sa më tepër në planin mësimor të shkollave. Përpjekje të tilla janë bërë para pak kohësh edhe në Itali ndërsa në Gjermani, krijimistët përpiqen të bëjnë përpara përmes librash që janë bërë gati për t'u futur fshehurazi nëpër shkolla. Çfarë po ndodhë vallë në Shqipëri e Kosovë ?

Kemi plot shembuj nga koha e komunizmit në Shqipëri që tregojnë se çfarë ndodh kur një ideologji kthehet në ekstremizëm.
Sidoqoftë, në një shkrim pasues të kësaj teme do të tregohet një shembull nga era staliniste që tregon se çfarë zhvillimi dramatik mund të marrin gjërat kur politika përpiqet të ndikojë përfundimet shkencore për t'i shfrytëzuar për qëllimet e veta.