Ndër idetë kryesore të planit rregullues të qendrës së Tiranës janë ato të moslejimit të ndërtimit të godinave të banimit më të larta se 9 kate, ndërtimi i kullave të larta paralele të destinuara për veprimtari tregtare dhe administrative, shndërrimi i sheshit Skënderbej në një vend kalimi vetëm për këmbësorët me gjelbërim etj.

Do duhen 30 vjet nese jane te gjitha fondet. Do të ketë qendra biznesi dhe shëtitore të mbushura me dyqane mode e kafene të vogla. Ndërsa bulevadri Dëshmorët e Kombit do të rrethohet nga shatërvane që do krijojnë pasqyra uji. Stacioni i Trenit do kthehet në një qendër të madhe biznesi. Do shtohen sipërfaqet e gjelbra në gjithë këtë hark. Ky projekt realizohet vetëm pasi qeveria të gjejë financimet.

Ideatori dhe mbështetësi kryesor i konkursit ndërkombëtar të shpallur për të bërë planin rregullues të qendrës së Tiranës ishte kryetari i bashkisë Edi Rama.

Ky studim e fut përfundimisht Tiranën në Hartën Europiane të Urbanistikës Moderne, zhvillim i nisur në vitet '30, nga Mbreti Zog. Studimi merr në konsideratë ruajtjen e formulimit urban dhe funksional të aksit qendror të qytetit të Tiranës si dhe ruatjen e traditës arkitekturore të trashëguar.

Fig. Architecture Studio, Paris

Në sheshin kryesor të qendrës së qytetit do të bëhen ndërhyrje në organizimin më të mirë funksional dhe estetik te sheshit qendror, duke krijuar hapësira publike dhe ndërhyrje arkitekturore. Gjithashtu, në këtë zonë trafiku është i eliminuar, me përjashtim të një linje publike tramvaji, që përshkon të gjithë gjatësinë, për një komunikim dhe komoditet të qytetarëve.

Gjithashtu, studimi parashikon shtimin dhe pasurimin e pjesës së gjelbërt ekzistuese, në territorin e Parkut "Rinia", vazhdimin në anën lindore të tij me pjesën e gjelbërt tek Galeria Kombëtare e Arteve dhe në vazhdim pranë Sallës së Kuvendit. Studimi nuk parashikon dendësimin me objekte, por ruan një ekuilibër të volumetrisë, duke mbrojtur këtë pjesë të rëndësishme të zonës qendrore të qytetit.

Sipas kryetarit të Bashkisë së Tiranës, Edi Rama, guri më i çmuar i këtij mozaiku kohërash e stilesh që përmban brenda saj qendra e kryeqytetit tonë do të jetë parku i madh që zbulohet pas Hotel Dajtit dhe që lidh, me një vijimësi të gjelbër e plot surpriza në nivele, tematika e bimësi, Parkun Rinia me Parkun e Namazgjasë.

Fig. Architecture Studio, Paris

Do te vihet dore mbi nje zone te Lanes ku do te ndertohet nje ure e cila do te rrethohet me peme nga te dyja anet e lumit.

Ndersa pjesa e trete e ketij projekti do te jete sheshi i universitetit i cili do te pastrohet nga shatervani i vjeter. Ai do te zevendesohet nga nje platforme te ngritur mbi nivelin e rruges, e cila do te permbaje nje shatervan te ri ne formen e drejtkendeshit, me te ceket dhe me te paster. Shatervani do te rrethohet me gjelberim dhe e gjithe platforma do t'i jape nje dimension tjeter vizual universitetit te Tiranes.

Fig. Architecture Studio, Paris

Një element i veçantë i studimit është dhe organizimi tepër i veçantë dhe i vlerësuar i zonës së stacionit të trenit. Sipas arritjeve të deritanishme, kjo zonë pretendon të bëhet një qendër e re dhe e rëndësishme tregtare, shërbimesh, rezidenciale dhe e transportit publik. Një Park i Ri Kombëtar do të ngrihet matanë Stacionit të Trenit duke i shtuar Tiranës një mushkëri të dytë e të shumënevojshme prej afro 235,000 m2. "Ky park, i cili bëri për vete Jurinë Ndërkombëtare dhe u dha arkitektëve francezë epërsinë finale mbi projektin e kolegëve të tyre gjermanë, nuk është aq utopik e i largët sa na u duk të tërëve në fillim", u shpreh Rama. Kryetari i Bashkisë shpjegoi se, shumatorja e metrave katrorë gjelbërim që do t'i shtohen Tiranës me këtë plan nuk mbaron me mbledhjen aritmetike të hapësirave të Parkut Qendror me ato të Parkut të Ri Kombëtar, pasi në tërë zonat e riformuluara të banimit në të dy krahët veriorë të aksit të Brazinit parashihet krijimi i ishujve të gjelbër për çdo bllok banimi në afro 9000 m2 gjithsej. Me ndërtimin e këtij Parku Qendror, Tirana do të fitojë brenda dy vjetësh një hapësirë të gjelbër prej 130,000 m2 mu në zemër të saj dhe më shumë se 1000 pemë të mbjella rishtaz në të.

Arkitekti dhe piktori Maks Velo thotë për BBC se planet rregulluese të përparshme para '90 kishin një difekt; bëheshin për një objekt të caktuar. Kurse për këtë plan rregullues ai mendon që do të ketë kundërshti nga ana e ndërtuesve të cilët do të duan gjithmonë të bëjnë siç kanë bërë deri tani, të imponojnë vullnetin e tyre. Tirana, shton ai, është qyteti me kontraste dhe me disakordin më të madh profesional që ekziston.

Architecture - Studio, që prej themelimit të saj më 1973 në Paris, është bazuar në projektet që përfshijnë një filozofi kolektive për një arkitekturë kolektive. Ndër projektet e kësaj firme janë: Ndërtesa e Parlamentit Evropian në Strasburg, Instituti Arab në Paris, Shtëpia e Arteve të Bukura dhe Letrave në Athinë, Universiteti i Dukendouf (Francë), Salla e Ekspozitave në Paris, një hotel në Torino (Itali), Kulla e Zyrave në Zuo Ying (Kinë), Masterplani i Qendrës Tregëtare në Shangai (Kinë), Bulevardi në Makkal (Arabi Saudite), Masterplani i Fshatit Olimpik Athinë 2004 (Greqi), Masterplani i provincës së Milanos (Itali), një projekt Masterplani në Casa Blanca (Marok), Pallati e Drejtësisë në Gaza dhe Ramallah (Palestinë), si dhe shumë projekte të tjera. Veprimtaria e Architecture Studio po rritet gjithnjë e më shumë në Evropë, Kinë dhe Shtetet e Bashkuara të Amerikës.
Architecture-Studio perbehet nga qindra arkitekte dhe inxhiniere urbaniste nga kombesi te ndryshme.

“Ne kemi realizuar mjaft projekte të mëdha, por ky është edhe më i madh sepse ka të bëjë me qendrën e një metropoli. Kjo na bën ta ndiejmë që kemi një përgjegjësi edhe më të madhe...Ne mendojmë se arkitektura është mbi të gjitha diçka sociale dhe që është rezultat si i një procesi konflikti, ashtu edhe i një shprehjeje konsensusi. Ne stimulohemi nga dimensioni kolektiv i punës në vendet e dimensioneve kolektive. Mund të themi se moderniteti, sot, është të jesh dhe të kesh në të njëjtën kohë. Por është hibridizimi, përplasja dhe dialogu, subjekti kolektiv që tejkalon kufizimet individuale”, - është shprehur Rouaida Ayache, duke prezantuar një pjesë të filozofisë arkitekturore të studios franceze Architecture - Studio.

Burimet: Gazeta Shqiptare, BBC në Shqip, Bashkia e Tiranës, Architecture Studio