|
Teknologji: Aeroplani Lockheed SR-71 Blackbird: më i shpejti dhe më lart i fluturu Nga Inxh. Saimir Lolja - Monday, 15 December 2003
|
 Qëkur parardhësi i tij Blackbird A-12 u testua më 1962 dhe u shfaq në botë më 1964, aeroplani Blackbird SR-71 dhe llojet e ngjashme me të – kahera të mbuluar me fshehtësinë e Luftës së Ftohtë – është bërë legjendar për shpejtesinë dhe fuqinë e ngritjes së tij. Akoma, shumë nga ç’është arritur gjatë misioneve të tij të zbulimit në lartësi të mëdha mbesin një enigmë.
Aeroplani eksperimental Blackbird X-15 fluturoi më lart dhe më shpejt se Blackbird SR-71. Megjithatë, nuk ka aeroplan tjetër të prodhuar që ta ketë barazuar llojin Blackbird SR-71 që arriti shpejtësinë rekord prej më shumë se Mach 3.3 (domethënë mbi 3.3 herë më shpejt se shpejtësia e zërit ose mbi 3540 km/orë). Ai u ngjit në lartësinë 26 km, gjë që i dha të drejtën të fluturonte për vëzhgime zbuluese mbi Bashkimin Sovjetik pa e shkelur hapësirën ajrore të tij. Në vitin 1974, aeroplani SR-71 vendosi disa rekorde shpejtësie të paarritshme, si për shembull udhëtimin Nju Jork – Londër për dy orë.
Forcat Ajrore Amerikane u detyruan ta ndërpresin programin Blackbird më 1990, por iu kthyen shkurtimisht në mesin e viteve 1990 dhe pastaj iu shkëputën atij përfundimisht. Agjensia Kombëtare e Aeronautikës dhe Hapësirës (NASA, National Aeronautics and Space Administration) kreu gjithashtu disa fluturime me aeroplanin SR-71 për qëllime shkencore, së pari gjatë viteve 1970 dhe pastaj gjatë viteve 1990 derisa i ndërpreu fluturimet me të në vitin 2001. Megjithëse dyzet vjet kanë kaluar qëkur aeroplani Blackbird SR-71 u projektua nga inxhinierët, shpejtësia dhe lartësia të arritura prej tij kanë ngelur akoma të paarritshme.
Aeroplani SR-71 ka dy pilotë: njëri për drejtim aeroplani dhe tjetri për zbulim-vëzhgimet. Ky aeroplan është i paarmatosur, por është i pajisur me një sistem elektronik kundërveprues. Aeroplani është i ndërtuar prej Titani ose përzjerje të tij që janë të afta t’i durojnë nxehtësisë së prodhuar nga shpejtsia shumë e madhe për shkak të fërkimit me ajrin. Ky aeroplan mban mbi 46 m3 vajgur si lëndë djegëse motorrike. Të dhënat e tij kryesore janë:
Gjatësia 32.74 m
Gjërësia përfshirë edhe krahët 16.94 m
Lartësia 5.64 m
Pesha më e madhe 77111 kg
Shpejtësia më e madhe 3715 km/orë
Largësia e fluturimit pa furnizim në ajër 3200 km
Largësia më e madhe e fluturimit 4800 km.
Përgatitur nga Inxh. Saimir Lolja
|
|
| |
| Vlerėso shkrimin | Nota mesatare: 4.82
Votues: 17
| |
|
