 Të moshuarit e kanë të vështirë për të mbajtur mend gjërat e rëndësishme për arsye se ata fusin në tru edhe gjëra të parëndësishme. Kjo del nga studimet e dy psikologëve gjermanë të zhvillimit të njeriut të cilët hetuan aftësinë për të "harruar me dashje" tek të rinjtë dhe të vjetërit.
Kjo aftësi për të harruar shkon duke humbur në mënyrë të dukshme tek pleqtë, kështu që ata e ngarkojnë kujtesën afatshkurtër duke e mbushur me një numër të pafundtë gjërash të parëndësishme dhe duke lënë kështu vetëm pak vend për gjërat e rëndësishme.
"Aftësia për të harruar është njëra nga funksionet themelore të kujtesës së njeriut", thotë Marcus Hasselhorn - njëri prej psikologëve që kryen hetimin në fjalë. Kjo aftësi shfaqet tek njeriu që në moshën gjashtë apo shtatë vjeçare.
Për hetimin u zgjodhën dy grupe njerëzish: nga njëra anë njerëz të moshave 20 deri 35 vjeç, ndërsa nga ana tjetër ata të moshave 60 deri 75 vjeç. Të dy grupeve u tha të mbanin mend disa rreshta fjalësh, ku gjatë hetimit njëri prej këtyre rreshtave u cilësua si i pavlefshëm dhe u nis nga e para. Në fund u bënë pyetje në lidhje me të gjitha rreshtat, përfshirë edhe atë që u cilësua i pavlefshëm. Doli se grupi i të moshuarve e mbante mend edhe rreshtin e pavlefshëm - ata mbanin mend po aq dobët të gjitha fjalët pa dallim.
Përgatiti : Alvin Ekmekçiu
Burimi: gazeta javore gjermane "Die Zeit". 25.09.2003
Vë re! Respekto punën tonë ! Mos përdor shkrimet e kësaj reviste pa lejen tonë dhe pa vënë në dukje se puna e kujt është !
|
