Nga Inxh. Saimir Lolja - E premte , 31 tetor 2003

Që të bëhet vera e akullit, rrushi është lënë në vreshtë deri sa të kalojë ngrica e parë. Pastaj ky rrush është vjelur i ngrirë siç është në vreshtë dhe po në atë gjendje të ngrirë është shtypur. Vjelja e një rrushi të tillë duhet bërë herët, mundësisht para orës 10:00 të mëngjesit. Gjatë procesit të vjeljes dhe shtypjes temperature nuk duhet të jetë më e lartë se – 8 oC. Tek kjo temperaturë kokrrat e rrushit janë të ngrira e të forta si një gur. Pra, ndërsa rrushi është akoma në gjendjen e tij të ngrirë, ai shtypet dhe në fillim del jashtë uji i tij në formë ciflash akulli. Kështu lëngu i rrushit që del më pas është mjaft i trashë e i përqëndruar në acide, sheqerna dhe aromatikë.

Ngrirja e rrushit duhet të jetë natyrore dhe vjelja e rrushit, që bëhet me dorë kokërr-më-kokërr, duhet të fillojë pas 15 Nëntorit; zakonisht kryhet në Dhjetor dhe Janar. Kërkesat e tjera për të bërë verë akulli janë:
a) fillimi grumbullimit të mushtit bëhet kur mushti ka arritur të paktën gradën 32 oBriks;
b) sheqeri i mushtit duhet të jetë 125 gram/litër;
c) fundi i grumbullimit të mushtit është kur mushti ka arritur të paktën gradën 35 oBriks;
d) alkoli i verës së përftuar duhet të jetë vetëm ai i sheqernave natyralë të rrushit.

Mushti i rrushit lihet të fermentohet për disa javë dhe më pas lihet në fuçija të paktën për disa muaj për t’u vjetëruar. Shija dhe aroma e verës së akullit është shumë e larmishme dhe e pëlqyeshme, ndërsa përqëndrimi alkoliki saj është rreth 10 %. Krahasuar me verën e zakonshme, duhen 10 herë më shumë rrush për të prodhuar të njëjtën sasi vere akulli. Vera e akullit hyn tek verërat e ëmbëlta dhe shërbehet pas të ngrënës.

Grada Briks është njësi matëse (e shprehur në përqindje) e përqëndrimit të sheqernave dhe lëndëve të tjera të ngurta të tretshme që ndodhen në lëngun e pafermentuar të rrushit apo frtutave të tjerë. Domethënë, 1 oBriks = 1%. Grada Briks matet nëpërmjet hidrometrit (të shpikur nga austriaku Adolf Briks më 1870) që tregon drejtpërsëdrejti përqindjen e sheqerit në lëng në një temperatureë të paracaktuar. Në prodhiminin e verës, përqëndrimi i alkoholit në verën e përfunduar është e barabartë 0.55 herë përqëndrimin e sheqerit (e shprehur në oBriks) të lëngut të pafermentuar të rrushit.