Nga Një burim - E mërkurë , 20 tetor 2004

Shtrëngim i politikave të azilit

Shumica e shteteve i kanë shtrënguar politikat e azilit, një lëvizje kjo, që sipas OKB-së ka ulur shifrat e pranimit të azilit. Kështu numri i refugjatëve dhe i personave që kërkojnë strehim në vende të tjera ka rënë me gati 22 përqind gjatë 3 vjetëve të fundit.

Gjermania ka numrin më të madh të refugjatëve në Evropën Perëndimore. Në dhjetor të vitit 2002, më pak se një milion shtetas të huaj ishin strehuar në Gjermani për arsye humanitare. Shumica e tyre janë nga ish-Jugosllavia, Turqia, Iraku dhe Irani. Por numri i azilkërkuesve ka rënë me 50 përqind pas kufizimeve që u vendosën në vitin 1993. Të gjithë azilkërkuesit janë të vendosur në qendrat e pritjes për deri në tre muaj, dhe nuk lejohen të punojnë. Ata marrin në dorë vetëm 38 dollarë në muaj. Përfitimet e tjera janë materiale.

Italia dhe Gjermania kanë dalur me propozimin për të krijuar qendra pranimi dhe mbajtjeje në Libi për emigrantët që vijnë në drejtim të BE-së, me qëllim që të vënë nën kontroll fluksin e mbërritjeve ilegale nga Afrika e Veriut. Disa qeveri të BE-së dhe grupe të të drejtave të njeriut pretendojnë se qendrat e pranimit në fjalë do t'u përngjajnë kampeve të përqëndrimit në shkretëtirën e Afrikës. Gjithashtu ka pasur debate lidhur me deportimet e fundit të Italisë për në Libi të mijëra emigrantëve ilegalë - kryesisht egjiptianë - sapo ata mbërritën në ishullin italian të Lampeduzas.

Megjithëse i kanë forcuar ligjet për azilin, pas sulmeve të 11 shtatorit, SHBA-ja është përgjegjëse për rishpërndarjen e refugjatëve në të gjithë botën. Azilkërkuesit duhet të aplikojnë me shkrim brenda një viti nga koha e vendosjes së tyre në SHBA. Azilkërkuesit nuk lejohen të punojnë në kohën që aplikimi i tyre është në proces e sipër. Kur e fitojnë të drejtën për azil, ata mund të fillojnë të kërkojnë një punë dhe mund të aplikojnë për statusin e banorit të përhershëm një vit më vonë.

Forcë puntore

Imigrantët formojnë një pjesë të rëndësishme të forcës punëtore në shumicën e vendeve të industrializuara. Sipas organizatës për Bashkëpunim dhe Zhvillim Ekonomik, (OECD) ka një interes në rritje për rekrutimin e punëtorëve të tjerë imigrantë në këto vende dhe kjo, për shkak të plakjes së popullsisë në vendet e industrializuara. Shumica e vendeve të industrializuara janë duke u përpjekur të tërheqin punëtorë të huaj profesionistë.

Paratë që çohen prej migrantëve në vendet e tyre të origjinës, janë një burim në rritje financimi nga jashtë për vendet në zhvillim. Të ardhurat nga jashtë, janë burimi i dytë i madh i të ardhurave, pas investimeve dhe financimeve të huaja për këto vende.

Burimet: Bumi i migracionit, Bie numri i refugjatëve dhe i personave që kërkojnë strehim në vende të tjera, Qendra mbajtjeje për emigrantët në Libi